Sejare grup band saingan the Bitel di Gg. Kingkit era taon tujuhpuluhan

(The Bitel adalah grup band pimpinan Mat Lenong merupakan singkatan Biji Gatel)

Nama aslinye Murtaba, name panggilannye Baba anak Gg. Kingkit IV, Pecenongan. Anak pertama Bang Murtado, waktu umurnye 17 th, emaknye meninggal dunia keserang setan kelere. Baba punya adik satu, beda umurnya 2 tahun, namanya Mursahi dipanggilnya Iie.

Dari  remaja Baba senang bermain musik, dia menguasai bermacam macam alat music tapi yang paling die seneng gitar melodi, sementare si Iie sukanye maen Drum ame gendang tabla, maklum bang Murtado, termasuk salah satu pemaen musik dangdut di bilangin kampungnye.

Baba betemen sama Mustari, tinggalnye di compak, samping toko Ataka, Juanda IIE. Mustari umurnye same ame si Iie, 15 th name panggilannye Uu, die juga ude ditinggal emaknye.  Mungkin karena same same piatu, Baba dan Uu kaye amplop ame perangko, lengket banget. Dimane ade Baba disitu pasti ade Uu, orang orang nyebut die Baba Uu, cocok banget deh jadi Bau.

Uu pinter maen bass, kalu si Baba, Uu dan Iie ngumpul maen musik, kayaknye klop banget deh suaranye, cuman sayang kurang rame aje, kalu ade ntu suare organ, wah … jadi Band deh.

Nyadarin kekurangannye, Baba ngajak Uu dan Iie berunding masalah tukang organ, siape kire kire yang pantes, bisa cocok dan juga kompak maennye.

Si Hamid anak tegalan yang biasa mijit di langgar Al karomah, kayaknye pijitannye monoton. Si Aing yang biase mencetin jerawat, tenagenye mencetnye kurang mantep. Cari punye cari, akhirnye Iie usulin si Tafsir, anak pinggir rel kereta api di Pasar Darurat, yang boleh dibilang daerah tempat tinggalnye mirip Bronxnye Amerike. Dari kecil ude ikut babenye jualan kue Pukis di Pasar Darurat, ngangkatin kue Pukis dari loyang, persis kayak die lagi maen Organ di group Samre bang Toyib.

Tafsir atawa Tata, waktu ditemuin nih tiga sekawan, lagi dagang kue pukis di Pasar Darurat, Iie ngeluarin duit gocengan sambil ngomong,

“Ta, yang pake kismis goceng, yang masih panas ye”, kate si Iie

“Ok, Ie”, sahut Tata sambil tangannye ngebuka tutup loyang panggangan kue pukis, terus dipotong potong lelehan kue yang nyambung atu ame laennye pake kape. Seudenya mise baru dicomot comotinnye kue pukis tadi kayak orang lagi maen organ.

“Gile, nih orang. Tangannye lihai juga”, ngebatin Baba dan Uu semben melongo ngeliat keahlian Tata.

Baba ngasih isyarat ke Iie, di jempolinnye si Tata.

Iie paham maksudnya Baba, terus die langsung tanye si Tata

“Ta, ente masih maen Organ?”

“Masih”, sahut Tata, “nih cara gue latihannye, gue colek Pukis panas secepetnye supaye gak kepanasan. Ngelatih kepekaan sentuhan gue” lanjut Tata ngejelasin.

“Ooo… mau gak ente gabung ame kite, kite nge Band yook”

“Bole aje, kapan? Ame tempatnye dimane?” tanye Tata.

“Nanti malem, kite kumpul di pos ronde, ujung gang IV deket Gang Mak Ile”, jawab Iie semangat.

“Jangan lupa, Ba’de ise ye!’, tereaknya sambil nyuap kue Pukis kedalem mulutnye

Malemnya, semue kumpul di Pos Ronde RT. 06, masing masing bawa peralatannye. Dicoba oleh Baba satu lagu yang populer dari Kansas “Dust in the wind”. Tuh lagu mantep banget, suare biola dimaenin pake Organ ame si Tata, mirip aslinye, akhirnye semuenye mantep dan sepakat mengangkat Tata ke dalem grupnye. Cuman si Baba bingung, kerne selame ini die die pade maen gak pake name,

“Mau dikasih name ape ye, group kite?” tanye Baba.

“Sasino aje”, nyeletuk si Iie

‘”Artinye apaan tuh?” tanye temen temennye bareng

“Sana sini nongkrong”, jawab Iie

“Jangan ah, kaye boker aje”, bilangnye si Tata

“yee ude deh … pake name name kite aje”, ujar si Baba

“Name yang mane Ba?” tanye Uu

“Namenye Baba Uu Tata Iie aje, resep kedengerannye”, ngejelasin si Baba.

Temen temennye setuju, mengkenye langsung keluar lagu yang berjudul sama, kaya dibawah eni,

Baba Uu Tata Iie

Chord: 

C    Am    F    G

C                             Am

Baba telah lama menanti

F                        G

Uu duga tak berarti

C                        Am

Tata kata coba ulangi 

F                       G  C7

Iie duga tak berarti

Reff:

F       G  C       Am

Baba Uu Tata Iie

F                 G                C C7

Cintamu kering tapi demek

F       G  C       Am

Baba Uu Tata Iie

F           G       C

Baaaaaaau  Tata……….

Lagu ini pada waktu itu sempet bertahan di tangga rume mak Inem, rekamannye bisa didapetin di toko besi ame material terdekat, tahu sekarang perkembangannye pade inget gak?

Glossary:

Setan Kelere      : Setan Kolera                                                   

Samre                   : Samrah, jenis kesenian betawi dulu

Kape                      : Alat berbentuk tipis dari seng                 

Semben               : Sambil

By 072X  +un0

RSS Diposting oleh ojak di 19.46