TRONDOL

Indonesia lagi ngebangun seude peristiwe G.30.S/PKI, nih cerite berlatar belakang pada tahun 1967 an. Pade waktu ntu Rumah rumah masih banyak yang dari bilik, ade juga separo batu separo lagi papan. Kalu ade rume yang dibikin dari batu bata dibilang orang rume gedong.

Belon keliatan deh bentuk Jakarte kayak sekarang kita liat ini di taon due ribuan. Kali Ciliwung masih bersih, penduduk kampung di bilangan Gang Kingkit, Pecenongan kadang masih sering mandi, nyuci dan buang hajatnye di kali Ciliwung, dulu ade tangge dari beton buat turun ke kali.

Tangganye ade di sebelah jalan veteran, orang orang yang mau ke kali dari Gang Kingkit, mesti nyebrang dulu liwatin jembatan yang ade di depan Kantor Departemen Dalam Negeri, terus turun di legokan kali yang ade sampe sekarang kire kire tempatnye di seberang Bank BRI Veteran.

Sepanjang kali, dulu masih banyak puun Flamboyant di kiri kanannye, kalu lagi bebunge indah banget keliatannye , bererot sepanjang jalan pinggiran kali, mulaen dari ujung Gunung Sahari sampe Harmoni. Bekas jalan Trem masih keliatan di tenge jalan, sekarang ude ketutupan aspal.

Jalanan dari Harmoni sampe Pasar Baru, yang ngeliwatin jalan Nusantara (sekarang Ir. H. Juanda) sampe depan Gedong Kesenian, lebarnye dari dulu ude segitu, belon pernah berobe. Cuman dulu keliatan kosong rade plong ngeliatnye, gak ade mobil sampe amprogan, bejubel gak keruan. Waktu ane masih kecil aje orang masih ade yang naek kude, atawa gerobag yang ditarik sampi atawe kude. Tukang bikin sepatu kudenya kalo sekarang adenye kire kire di depan sekolahan Bethanie di gang Sehe (Pintu Air II) deket Kolf (Percetakan zaman Belanda).

Kite gak ceritain lebih lanjut Pecenongan tempo dulu, tapi kite ceritain susenye orang dulu. Nah disini kite ceritain tentang Bang Jadun yang kerjenye jadi supir di salah satu Departemen, statusnye  pegawe negeri . Waktu ntu, gaji pegawe negeri sohor banget deh, banyak kurangnye dari cukupnye.

Pusing tujuh keliling bang Jadun mikirin kondisi kantongnye yang lagi gak keruan, anak ade lime, mane mertua perempuan lagi nginep, baru dateng dari Cibinong. Duit simpenan sih masih ade, Cuman die ngebayangin paling cukup buat tige hari.

Akhirnye, die sengaje lembur, begitu orang ude pade pulang jam 15.30, die izin mau bawa mobil ke bengkel yang die ude cariin alesannye dari pagi, padahal tuh mobil die pake buat nambang (sekarang di taksikan). Dari Jam empat sore sampe jam sepuluh malem, lumayan juga tuh duit masuknye.

Die ude izin pulangin mobilnye besok pagi pagi banget, makenye tuh di mobil dibawa pulang kerumenye. Rumahnye ude gelap, maklum ude pade tidur semua. Die ke belakang nyari tempat buat bensin Karena tanggung tadi ngisi bensin kebanyakan waktu nganter pelanggan ke Gandaria, die sedot lagi deh tu bensin ditaro di ember kaleng ukuran 10 liter(dulu belon ade ember plastik ye pembace), terus ditutupnye pake tetampah.

Di taronye ember tadi di deket tiang pojok kiri belakang rumah (rumah betawi dulu, umumnya di belakang rumah ada dapur tapi berada di luar rumah dan ada bale-bale/tapang tempat menumis, ada yang sebut serondotan/serondoyan rumah, kemudian dari ujung tiang serondotan belakang rumah biasanya ada lagi halaman kosong lagi kira kira 3-4 meter, umumnya disinilah letaknya sumur yang umumnya digunakan bersama sama. Belakang rumah ini umumnya gelap dan tidak ada lampu, karena  Listrik dulu juga masih susah ya pembaca). Seude kelar Bang jadun terus ngaso di kursi depan sambil ngerokok, terus die kepulesan.

Tengah malem, Pok Salme, bininye bang Jadun mendusin, die kebelet kencing, mau ke sumur takut. Dibangunin bang Jadun yang lagi tidur di kursi,

“Bang …. Bang … bangun Bang”, katenye.

Bang Jadun mendusin, matenye masih ngantuk, maklum tidur semalem telat.

“Ade ape sih Me”, sahutnye.

“Anterin aye ke sumur bang, mau pipis nih”, pok Salme rade ngerengek.

“ Ah, elu mah segitu aje takut, belis juga males kali godain elu”, kate bang Jadun semben nguap, kerne ngantuk, terus die bangun nyariin sendalnye dan dengan langkah setengah diseret die anterin juga pok Salme ke belakang.

Sebenernye bang Jadun juga penakut, cuman kerne die gak tega ame bininye dianterin juga tuh pok Salme, tapi pas ude keluar pintu belakang die liat begitu gelap di sumur, mane di sebelenya ade Puun Mangga sama puun pule, die ngomong ke bininye,

“Me, pipisnye di pojok situ aje deh di bawe puun teh-tehan gue ngantuk nih”, katenye semben duduk di pinggir tapang.

Pok Salme semben ngedumel, die nurutin juga omongan lakinye, die nongkrong di pojokan deket ember yang semalem dibawa bang Jadun. Seabis pipis pok Salme ngerawel gayung yang dari batok kelape dari pinggiran tapang, terus die buka tutup ember dan diciduknye aer dari dalam ember, buat cebok. Begitu die guyur, namenye bensin kene barang yang rawan, dinginnye minte ampun dan sedikit perih.

“Aduh .. bang, koq begini, kenape nih!” tereak pok Salme kalang kabut.

Bang Jadun yang lagi ngelindur, kaget. Di liat bininya masih nongkrong jejeritan, kaennye ude kemane-mane.  Kerne belakang rumah gelap gak kelihatan ape ape, dirogoh kantongnye, dikeluarin geretan terus disundut dan disuluhin ke barang pribadinye pok Salme, langsung aje bul, tuh api nyamber ke selangkangannye pok Salme yang kesiram bensin. Bul bulunye abis kebakar, pok Salme kelimpungan.

Pok Salme nangis jejeritan, anaknye ame mertue bang Jadun bangun, begitu juga tetangge, semua pade ngelongok, dipikir orang bang Jadun ribut ame bininye. Pok Salme dibawa masuk nyak Buang, emaknye pok Salme, same tetangge perempuan yang laen. Seude diobatin dan orang yang kumpul ude jelas duduk perkarenye, begitu nyak Buang keluar, langsung aje bang Jadun yang merase sale, nanya ke mertuanye,

“Gimane nyak si Salme?gak kenape nape?”, Tanya bang Jadun kuatir

“Ude gak ape ape sih, cuman pade trondol jadi kayak punye anak orok”, kate mertuanye.

Bang Jadun sama tetangga yang lain yang denger Cuma nyengir aje, semben ngomong

“Tapi gak kayak serabi angus,  kan nyak?, becande si Miung, tetangge sebele rume.

“kayak serabi angus sih kagak, cuman kayak anak ayam baru netes iye”, sahut mertuanye.

Semua orang lega dan pulang ke rumah masing masing, begitulah kalu orang berbuat sale pasti ade aje kejadiannye.

Glossary

Legokan               = Tempat yang agak masuk ke dalam.

Bererot                = berderet.

Amprogan            = bertemu muka.

Tambangan           = sewaan.

Kelar                   = dari bahasa Belanda, Klaar, = selesai.

Ngerengek           = memohon dengan sedih.

Belis                    = Iblis (setan)

Semben               = sambil.

Nelongok            = menengoki.

By 072X  +un0

RSS Diposting oleh ojak di 19.24